‘ कलावंत ‘ कलासंचालकांचे कारनामे ! भाग दोन

राजीव मिश्रा हे जेजेच्या आर्किटेक्चर कॉलेजचे प्राचार्य . सरकारनं त्यांना जेजेच्या सर्व परिसराची व्यवस्था पाहण्यासाठी म्हणून त्यांना फडणवीस सरकारच्या काळात तिथं नेमलं .  चित्रकला विश्वाशी त्यांचा संबंध दुरान्वयानं देखील नाही. साहजिकच त्यांनी आपला व्यवस्थापन क्षेत्रातला अनुभव पणाला लावून कलासंचालनालयाचं कलेवर सावरण्याचा प्रयत्न केला . अत्यंत निर्हेतुक पद्धतीनं त्यांनी परीक्षांचं वगैरे व्यवस्थापन केलं . पण साबळे यांनी आल्या आल्या ती व्यवस्थाच मोडीत काढली.  तिथं आपल्या  विश्वासातली माणसं भरली . हे करताना त्यांनी परीक्षकपदाला देखील हात घालून तिथली जे जे आणि अन्य दोन शासकीय कलाशिक्षण संस्थामधली ” पदवीप्राप्त” अनुभवी  शिक्षक मंडळी काढून टाकून त्यांच्या जागी अशा स्वरूपाच्या परीक्षांच्या व्यवस्थापनाचा  कुठलाही अनुभव नसलेली अनुदानित आणि विनाअनुदानित कलाशिक्षण संस्थांमधली शिक्षक मंडळी अत्यंत बेमुर्वतखोरपणे निर्णय घेऊन नेमून टाकली . त्यातली बहुसंख्य साबळे साहेबांच्या जेजेमध्ये झालेल्या सत्काराला उपस्थित होतीच हे वेगळे सांगावयास नकोच . महाराष्ट्राच्या अगदी कानाकोपऱ्यातल्या ” पदविकाधारक ” शिक्षकांना त्यांनी या कामासाठी नेमून टाकलं .आता उदाहरणार्थ सांगली , सातार , कोल्हापूरकडे पदवी शिक्षण देणारं कला महाविद्यालयच  नाही . पण तिकडच्या ‘ पदविका ‘ म्हणजे ‘ डिप्लोमा ‘ कॉलेजच्या शिक्षकांची नेमणूक देखील मुंबईतल्या  सीईटी परीक्षेच्या पॅनलवर करावयास साबळे यांनी मागे पुढं पाहिलं नाही. परिणामी यंदाच्या सीईटी परीक्षेच्या निकालात महाप्रचंड गोंधळ झाला .

ज्यांना सीईटी परीक्षा म्हणजे काय हे देखील ठाऊक नाही .ज्यांना पदवी परीक्षेचा अभ्यासक्रम कसा असतो ते देखील ठाऊक नाही,  ज्यांना तीन तीन हजार उत्तरपत्रिका तपासण्याचा देखील किमान अनुभव नाही , असे सारेच  पदविका ( डिप्लोमा ) प्राप्त प्रभारी कलासंचालकाच्या नेतृत्वाखाली एकत्र आल्यावर जे काही व्हायला हवे होते तेच नेमके यंदाच्या सीईटी परीक्षेच्या निकाला संदर्भात घडले आणि महाराष्ट्र्र सरकारची पुरती नाचक्की झाली . सर्व प्रकारच्या  काळ्या कारवायांसंदर्भात कलासंचालनालयाची भरपूर बदनामी या आधी झालेली आहे पण  सीईटी संदर्भात  कलासंचालनालयावर इतकी बेअब्रू होण्याची वेळ या आधी कधीच आली नव्हती . साबळे साहेबांनी आपल्या ‘ कलावंत कलासंचालक पदाच्या पहिल्याच तिमाहीत तो पराक्रम करून दाखवला या बद्दल आता कोणाला जबाबदार धरायचं या प्रश्नाचं उत्तर माजी उच्चशिक्षण मंत्री उदय सामंत आता तरी  देणार आहेत का ?