कलावंत कलासंचालकांचे कारनामे !

त्यांनी आजवर दाखवलेल्या किंवा उधळलेल्या रंगांचं मूल्यमापन , विश्लेषण किंवा पृथ:करण करण्याचं काम सुरुच आहे. योग्य वेळ येताच ते सारं आम्ही पुराव्यानिशी जाहीर करुच पण त्या आधी कला संचालनालयाच्या सीईटी परीक्षेचे जे धिंडवडे त्यांनी काढले आहेत त्यांचा समाचार घेणं अत्यावश्यक वाटतं आहे. माझी नवी तरुण सहकारी कनक वाईकर हिनं या सीईटी परीक्षेसंदर्भात जी स्टोरी दिली ती वाचून कलाक्षेत्रातल्या अनेकांच्या तळपायाची आग मस्तकात गेली असेल . खरोखरच संतापजनक प्रकार आहे हा सारा . महाराष्ट्रातल्या तीन हजार मुलांच्या आयुष्याशी म्हणजे पर्यायानं महाराष्ट्राच्या कलाक्षेत्राशी खेळण्याचा अधिकार साबळे याना कोणी दिला असा प्रश्न आता तरी सरकारमधली कुणी जबाबदार व्यक्ती साबळे याना विचारणार आहे का ? का हे सारं घडवून आणल्याबद्दल कायमस्वरूपी कलासंचालकपदावर त्यांची नेमणूक करणार ? असा जाहीर प्रश्न आम्ही उच्चशिक्षण मंत्री चंद्रकांतदादा पाटील याना विचारू इच्छितो .गेली तब्बल ४०- ४२ वर्षं आम्ही विविध माध्यमातून जे जे आणि कलाक्षेत्राचे ज्वलंत प्रश्न प्रत्येक तंत्रशिक्षण मंत्र्यांसमोर अत्यंत कळकळीनं मांडतो आहोत पण कुणीच कसं याची दखल घेत नाही याचं आश्चर्य वाटतं . नाही म्हणायला जेजेचा कॅंपस मात्र अजून जागच्या जागी शिल्लक राहिलाय ( तो देवनारला हलवायचे प्रयत्न देखील झाले , नाही असं नाही .)  पण बाकी सारं मात्र गेल्या ४० वर्षात अक्षरश: नेस्तनाबूत केलं गेलं आहे. कलासंचालक नाही , सुशिक्षित सुसंस्कृत अधिष्ठाता नाहीत , प्राध्यापक नाहीत , अध्यापक नाहीत , शिपाई नाहीत , सुरक्षा रक्षक नाहीत , एव्हडा मोठा झाडांनी आच्छादित परिसर पण माळी देखील नाहीत . अशी गेल्या ३५ वर्षात सरकारनं आपल्या अनास्थेपायी या  जागतिक दर्जा प्राप्त संस्थेची दुर्दशा करुन ठेवली आहे .

याचा फायदा मधल्या काळात  मंत्र्यांच्या खाजगी सचिव , स्वीय साहाय्यक आणि गुंडपुंडांनी घेतला नसता तर नवलच . त्यांनी मग काहीही करायचं शिल्लक ठेवलं नाही . पदं , भरती , प्रवेश साऱ्याच विभागात अक्षरश: नंगानाच केला त्यांनी  . ओवाळून टाकलेली माणसं एकत्र आल्यावर जे काही होतं ते आता इथं होऊन गेलेलं आहे . त्याचेच अवशेष सीईटी परीक्षेतील भ्रष्टाचाराच्या रुपानं डोकं वर काढू पाहत आहेत . सीईटी परीक्षेला बसलेल्या एका मुलीला निकाल का लांबतोय हे कळेना आणि त्यातून तिनं संगणकावर शोध घ्यायला सुरुवात केली आणि अचानक तिला आपला निकाल पाहता येतो आहे याचा शोध लागला. तो तिनं आपल्या क्लासच्या सरांना दाखवला . सरांनी  मग त्यात प्रातिनिधिक स्वरुप लक्षात यावं यासाठी आणखी २५ नंबरांची भर घातली आणि साऱ्यांचे  पेपर्स मिळवले . त्यांचा  अभ्यास केल्यावर या साऱ्या प्रकारामागची मोडस ऑपरंडी त्यांच्या लक्षात आली आणि मग त्यांनी थेट आमच्याशी संपर्क साधला .