गप्पा सायकलवरुन भारत दर्शनाच्या…

२०१९ सालातली गोष्ट. असाच एप्रिल किंवा मेचा महिना होता. मुंबईच्या एका वृत्तपत्रात चार ओळींचीच बातमी आली होती की, जेजे स्कूल ऑफ आर्टचा एक विद्यार्थी सायकलवरुन भारताच्या प्रवासाला निघणार होता. इतकीच. माझं कुतूहल चाळवलं. त्यात मला स्टोरी दिसत होती. बातमी छापणाऱ्या वृत्तपत्राला ती कशी दिसली नाही याचंही मला आश्चर्य वाटलं.

प्रतीक तेव्हा जेजेच्या शिल्पकला विभागात शेवटच्या वर्षाला शिकत होता. स्नेहलने त्याच्याशी संपर्क साधला आणि सुरेख लेख लिहिला. तिचाही तो पहिलाच प्रयत्न होता. पण तिनं आजवर केलेली धडपड कामी आली होती.

मदतीचे असंख्य हात पुढे आले. कुणी कुणी काय काय देऊ लागले याची गणतीच राहिली नाही. काही काळ त्या उत्साहाला आवर देखील घालावा लागला. कुणी त्याला कपडे दिले, कुणी शूज, कुणी बॅग. एकानं तर त्याला महागडी सायकल दिली. आर्थिक साहाय्य करणारे तर सारेच होते.

अशा तऱ्हेनं जेजेमधूनच त्याच्या कला प्रवासाला आरंभ झाला. हळू हळू त्यानं आपलं लिखाण चिन्ह’ला पाठवायला सुरुवात केली. त्यालाही वाचकांचा मोठा प्रतिसाद मिळाला. निम्याहून अधिक यात्रा पूर्ण झाली असताना अचानक कोरोना लॉकडाउन सुरु झाला आणि त्याला यात्रा थांबवावी लागली. त्यावेळी तो पश्चिम बंगालमध्ये होता. तिथून तो मुंबईला परतला. गच्चीवरील गप्पांमध्ये सहभागी देखील झाला.

तब्बल दोन वर्षानंतर त्याची यात्रा पुन्हा सुरु झाली. आणि येत्या ५ व ६ तारखेला ती तो संपवणार आहे. जिथनं त्यानं यात्रा सुरु केली होती. त्या जेजे स्कूल ऑफ आर्टमध्ये तो आपल्या यात्रेचा शेवट करणार आहे.

५ एप्रिल च्या संध्याकाळी ५.०० वाजता हा कार्यक्रम होणार आहे. संपूर्णपणे नवीन टीमच्या हातात ह्या कार्यक्रमाची सूत्रं दिली आहेत. ‘गच्चीवरील गप्पां’च्या बहुतांशी कार्यक्रमात जिनं मला साथ दिली ती गीता कुलकर्णी या कार्यक्रमाचं सूत्रसंचालन करणार आहे. तिच्या सोबत प्रश्न विचारण्याची कामगिरी ‘चिन्ह’ आर्ट न्यूजची कार्यकारी संपादक कनक वाईकर पार पाडणार आहे. आणि ‘कमी तिथं आम्ही’ या न्यायानं मी या कार्यक्रमात सहभागी होणार आहे.